ທ່ຽວພູຫຍ້າຄາກ່ອນມີການປັບປຸ່ງເສັ້ນທາງ

ຫວ່າງວັນທີ 11-12 ກັນຍາ 2021ນີ້ ແອັດມິນ ໄດ້ມີໂອກາດໄປທ່ຽວພູຫຍ້າຄາ ກັບທີມງານຫ້ອງການຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ເມືອງໄຊສົມທົບກັບອົງການປົກຄອງບ້ານຫຼັກ 32 ຂຶ້ນໄປສຳຫຼວດ ແລະ ສຶກສາຄວາມເປັນໄປໄດ້ໃນການພັດທະນາແຫຼ່ງທອງທ່ຽວທຳມະຊາດ ພູຫຍ້າຄາ ຢູ່ບ້ານຫຼັກ 32 ເມືອງໄຊ, ເຊິ່ງມີຜູ້ເຂົ້າຮ່ວມທັງໝົດ 18 ທ່ານ, ຍິງ 5 ທ່ານ

ເຊິ່ງພວກເຮົາອອກຈາກບ້ານເວລາ 9 ໂມງເຊົ້າ ຂອງວັນທີ 11 ດ້ວຍລົດຊິ້ງ 2 ຄັນ ໃນຊວງທີ່ຂີ່ລົດໄປພວກເຮົາກໍ່ລົງ ຕິດປ້າຍຫ້າມຕັດໄມ້ ມີຢູ່ 3 ຈຸດ ກ່ອນຈະຮອດຈຸດສຸດທ້າຍທີ່ລົດຊິ້ງສາມາດໄປໄດ້ ເຊິ່ງໃຊ້ເວລາ 2ຊົ່ວໂມງຕໍ່ຈາກຈຸດທີ່ລົດໄປສົ່ງຮອດ

ພວກເຮົາກໍ່ໄດ້ຍ່າງຕໍ່ຈົນຮອດຈຸດພັກ ຫຼື ຈຸດທີ່ເຂົາຮ້ອງວ່າສະໜາມບິນສະໄໝກ່ອນ ໃຊ້ເວລາ 1 ຊົ່ວໂມງ ເຊິ່ງພວກເຮົາໄປຮອດຈຸດດັ່ງກ່າວຫັນເວລາ 12 ໂມງ ພວກເຮົາໄດ້ສືບຕໍ່ຍ່າງໄປໃຊ້ເວລາປະມານ 20 ນາທີ່ເພື່ອໄປພັກກິນເຂົ້າທ່ຽງຢູ່ຈຸດ #ພະຫຍາງູ

ຫຼັງຈາກພັກຜ່ອນກິນເຂົ້າທ່ຽງແລ້ວພວກກໍ່ໄດ້ຍ່າງຕໍ່ໄປຍັງພູຫີນຕັ້ງ ຫຼື ປະຕູສະຫວັນ ໃຊ້ເວລາປະມານ 30 ນາທີ

ຫຼັງຈາກຖ່າຍຮູບເກັບພາບຕ່າງໆແລ້ວພວກເຮົາກໍ່ສືບຕໍ່ຍ່າງໄປຫາຈຸດທີ່ພວກເຮົາຈະກາງເຕັນນອນຂອງຄໍ່າຄືນມື້ນັ້ນເຊິ່ງພວກເຮົາໄດ້ເລືອກນອນຢູ່ໜ່ວຍພູທີ່ໃກ້ໆກັບໜ່ວຍພູທີ່ມີໜ່ວຍຫີນຮູບປາໂລມາ ແລະ ເກັດເຕົ່າ ຫຼື ອອງເຕົ່າ ເຊິ່ງພວກເຮົາໄດ້ໄປຮອດຈຸດກາງເຕັນເວລາ 5 ໂມງແລງ

ເຊິ່ງແຕ່ລະຄົນຕ່າງຕື່ນຕາຕື່ນໃຈກັບພາບ ບັນຍາກາດ ແລະ ທິວທັດທີ່ສວຍສົດງົດງາມຂອງສະຖານທີ່ແຫ່ງນັ້ນຢ່າງອະທິບາຍບໍ່ຖືກ ແຕ່ລະຄົນເພີນກັບການຊົມວິວ ແລະ ຊົມຕາເວັນຕົກດິນ ຮູ້ຕົວອີກທີ່ກໍ່ຄໍ່າມືດຈົນລືມກາງເຕັນ

ສຸດທ້າຍກໍ່ພາກັນກາງເຕັນໃນສະພາບທີ່ມືດລຳບາກແຕ່ກໍ່ພໍມີແສງໄຟທີ່ພວກເຮົາດັງ ແລະ ແສງໄຟສາຍຊ່ວຍໃນການກາງເຕັນຈົນສຳເລັດ ພໍຕົກຄ່ຳມາສິ່ງທີ່ຂ້ອຍຄິດໄວ້ມາຕະຫຼອດທາງກໍ່ຄືການຖ່າຍດາວເວລາກາງຄືນ ແລະ ກໍ່ໂຊກດີ ເບິ່ງທຸກຢ່າງຈະເປັນດັ່ງຂ້ອຍຄາດໄວ້ ຄືນນັ້ນເປັນຄືນເດືອນແຮມ ເດືອນລັບຈາກຂອບຟ້າປະມານ 8:30 ໂມງ ເຮັດໃຫ້ທ້ອງຟ້າເຕັມດວງດາວ ແລະ ທາງຊ້າງເຜຶອກກຳລັງອອກມາກົດຕົວຢ່າງເຫັນໄດ້ຊັດ ແລະ ຂ້ອຍກັບໝູ່ຂ້ອຍບໍ່ລໍຊ້າ ຟ້າວລັນຊັດເຕີກ້ອງຢ່າງບໍ່ຢຸດ ຢາກຈະບອກວ່າມັນສຸດຍອດອີຫຼີເພາະເປັນຄັ້ງທຳອິດທີ່ໄດ້ຖ່າຍດາວ ແລະ ຖ່າຍອອກມາໄດ້ສວຍຂະໜາດນິ້ ຖ່າຍໄປຈົນແບັດກ້ອງໝົດຈຶ່ງພາກັນນອນໃນຂະນະທີ່ທຸກຄົນນອນຫຼັບໝົດແລ້ວ. ພໍຕື່ນເຊົ້າມາກໍ່ພົບກັບພາບທິວທັດທີ່ເກີນຈະບັນຍາຍ ທັງໄດ້ຊົມຕາເວັນອອກ, ໝອກກໍ່ຕົວເປັນດັ່ງທະເລ ແລະ ເທ່ຈາກທີ່ສູງລົງຫາທີ່ຕໍ່າຄືດັ່ງນ້ຳຕົກຕາດ ຈາກຄວາມເມືອຍທີ່ຍ່າງມາໝົດມື້ກໍ່ຫຼຸດລົງມາເຫຼືອສູນ ມີແຕ່ຄວາມສົດຊື່ນ ແລະ ມີພະລັງ ບວກກັບຈິດໃຈທີ່ປອດໂປງ. ພໍແຕ່ໄດ້ດື່ມດຳກັບບັນຍາກາດນັ້ນແລ້ວພວກເຮົາກໍ່ພາກັນກິນເຂົ້າຕື່ມພະລັງງານ ແລະ ເກັບເຄື່ອງຂອງເພື່ອຊົມວິວໃນຈຸດຕໍ່ໄປພ້ອມທັງເດີນທາງກັບ ພວກເຮົາອອກຈາກຈຸດກາງເຕັນເວລາ 9 ໂມງ ແລະ ໄປເລາະຖ່າຍຮູບອີກໃຊ້ເວລາ ຊົ່ວໂມງເຄີ່ງແລ້ວອອກຈາກພູຫຍ້າຄາ ເວລາ

10:30 ໂມງ ຮອດຈຸດ ກິນເຂົ້າທ່ຽງ ເວລາ 1 ໂມງ (ໃນນີ້ພວກຈະບໍ່ໄດ້ກັບທາງເກົ່າ ເຊິ່ງປົກປະຕິແລ້ວທາງໄປພູຫຍ້າຄາມີ 2 ທາງຄື: ທາງຫົວພະຫຍາງູ ແລະ ທາງພູປາໂລມາ ຄັ້ງນີ້ພວກໄປທາງຫົວພະຫຍາງູ ກໍ່ເລີບກັບທາງ ພູປາໂລມາ) ຫຼັງຈາກກິນເຂົາສວຍແລ້ວພວກເຮົາກໍ່ຍາງອີກປະມານ ຊົ່ວໂມງເຄີ່ງເພື່ອກັບຮອດຈຸດທີ່ລົດຊິ້ງຈະມາຮັບ ແລະ ພວກເຮົາກໍ່ກັບຮອດບ້ານເວລາ 4 ໂມງແລງຂອງວັນທີ 12

 ສະຫຼຸບ: ຄືແອັດມິນໄປທ່ຽວພູຫຍ້າຄາຄັ້ງນີ້ເປັນຄັ້ງທີ່2ແລ້ວ ແຕ່ກະຍັງຢາກໄປອີກຮູ້ສຶກບໍ່ເບື່ອເລີຍ ເຖິງວ່າເມືອຍແດ່ແຕ່ກໍ່ຄຸ້ມເກີນພະລັງງານທີ່ເສຍໄປ ຢາກບອກວ່າ ພູຫຍ້າຄາ ເປັນແຫຼ່ງທ່ອງທ່ຽວໜຶ່ງທີ່ມີຄວາມສວຍສົດງົດງາມທີ່ເທົ່າເຄີຍເຫັນໃນລາວແບບພະຈົນໄພເລີຍ ເປັນແຫຼ່ງບຳບັດຈິດໃຈ ແລະ ຮ່າງກາຍ ບໍ່ວ່າເຈົ້າຈະເລື່ອງທີ່ກຸ້ມໃຈຫຼືບັນຫາໃດໆກໍ່ຕາມໃນຊີວິດດຖ້າເຈົ້າໄປຮອດແລ້ວເຈົ້າອາດຮູ້ສຶກໂລງໃຈປ່ອຍວາງແລະເຂົ້າໃຈກົດຂອງທຳມະຊາດຫຼາຍຂື້ນ.

  ສິ່ງທີ່ຢາກຝາກ:

   – ສຳລັບພາກສ່ວນໃດກໍ່ແລ້ວແຕ່ ບໍ່ວ່າຈະເປັນຂັ້ນບ້ານ ເມືອງ ແຂວງ ຫຼື ນັກທຸລິດ ບໍລິສັດຕ່າງໆ ທີ່ຈະມາບູລະນະ ສຳປະທານສະຖານທີ່ແຫ່ງນີ້ ກໍ່ຂໍໃຫ້ມີຄວາມຮັບຜິດຊອບສູງ ມີຄວາມຮັກມັກໃນທຳມະຊາດຢ່າງແທ້ຈິງ ບໍ່ຫວັງກອບໂກຍ ລັກລອບຊັບສົມບັດ ຊັບພະຍາກອນອັນມີຄຸນຄ່າ ສ້າງເປັນແຫຼ່ງທ່ອງທຽວເຊີງອະນຸລັກຢ່າງແທ້ຈິງ ໃຫ້ຊາວບ້ານມີສ່ວນຮ່ວມແລະຮັບຜົນປະໂຫຍດຢ່າງເທົ່າທຽມ.

  – ສຳລັບຊາວບ້ານ: ແມ່ນໃຫ້ພ້ອມກັນອະນຸລັກປົກປັກຮັກສາເຫັນຄຸນຄ່າຂອງພູຫຍ້າຄາ ແລະ ເຂດປ່າສະຫງວນແຫ່ງຊາດ ບໍ່ໃຫ້ໃຜໄປທຳລາຍ ຫຼື ລັກລອບຕັດໄມ້ ແລະ ລ່າສັດໃນຂົງເຂດນັ້ນ.

  – ສຳລັບນັກທ່ອງທ່ຽວ: ຫ້າມດັດແປງ ທຳລາຍ ແລະ ຫ້າມຖິ້ມຂີ້ເຫຍື້ອຊະຊາຍໃນຕະຫຼອດທາງຈົນເຖິງເຂດພູຫຍ້າຄາ.

Leave a Reply

%d bloggers like this: