ບົດຄວາມຫຼ້າສຸດກ່ຽວກັບການເໜັ່ງຕີງຂອງລາຄານ້ຳມັນ

🔥​ປັດຈຸບັນ, ລາຄານໍ້າມັນເຊື້ອໄຟໃນຕະຫຼາດໂລກ ເວົ້າລວມ, ເວົ້າສະເພາະ ລາຄານໍ້າມັນເຊື້ອໄຟສໍາເລັດຮູບຕະຫຼາດສິງກະໂປ ຍັງມີການປັບຂຶ້ນສູງ ໂດຍການຕິດຕາມລາຄາສະເລ່ຍແຕ່ວັນທີ 31 ພຶດສະພາ ຫາ 3 ມິຖຸນາ 2022 ເຫັນວ່າ ລາຄາສະເລ່ຍນໍ້າມັນແອັດຊັງພິເສດ ແມ່ນ 153,12 ໂດລາສະຫະລັດຕໍ່ບາເຣວ (1,0380 ໂດລາຕໍ່ລິດ), ນໍ້າມັນແອັດຊັງທໍາມະດາ ແມ່ນ 147,64 ໂດລາສະຫະລັດຕໍ່ບາເຣວ (0,9986 ໂດລາຕໍ່ລິດ) ແລະ ກາຊວນແມ່ນ 168,16 ໂດລາສະຫະລັດຕໍ່ບາເຣວ (1,0576 ໂດລາຕໍ່ລິດ).

ນອກຈາກນັ້ນ ຍັງເຫັນວ່າ ລາຄານໍ້າມັນກາຊວນ ສູງກວ່າລາຄານໍ້າມັນແອັດຊັງທໍາມະດາ ຫຼາຍສົມຄວນ ແລະ ເມື່ອສົມທຽບກັບລາຄາທີ່ຈັດຕັ້ງປະຕິບັດຄັ້ງວັນທີ 1 ມິຖຸນາ 2022 ຜ່ານມາ ຄື: ລາຄານໍ້າມັນແອັດຊັງພິເສດ ປັບຂຶ້ນ 1.700 ກີບຕໍ່ລິດ ຫຼື 6,06 % (ຈາກ 28.070 ກີບຕໍ່ລິດ ປັບຂຶ້ນເປັນ 29.770 ກີບຕໍ່ລິດ); ລາຄານໍ້າມັນແອັດຊັງທໍາມະດາ ປັບຂຶ້ນ 1.630 ກີບຕໍ່ລິດ ຫຼື 7,45 % (ຈາກ 21.890 ກີບຕໍ່ລິດ ປັບຂຶ້ນເປັນ 23.520 ກີບຕໍ່ລິດ) ແລະ ລາຄານໍ້າມັນກາຊວນ ປັບຂຶ້ນ 2.820 ກີບຕໍ່ລິດ ຫຼື 13,86 % (ຈາກ 20.340 ກີບຕໍ່ລິດ ປັບຂຶ້ນເປັນ 23.160 ກີບຕໍ່ລິດ).

ດັ່ງນັ້ນ, ໃນກອງປະຊຸມຄະນະປະຈໍາສະພາແຫ່ງຊາດ ຄັ້ງວັນທີ 06 ມິຖຸນາ 2022 ໄດ້ມີທິດຊີ້ນໍາເຫັນດີ ໃຫ້ລັດຖະບານ ປັບຫຼຸດອາກອນຊົມໃຊ້ນໍ້າມັນແອັດຊັງທໍາມະດາ ແລະ ອາກອນຊົມໃຊ້ນໍ້າມັນກາຊວນລົງ. ນອກຈາກນັ້ນ, ລັດຖະບານ ຍັງມີທິດຊີ້ນໍາໃຫ້ປັບຫຼຸດອັດຕາຄວາມສ່ຽງຄືນໃໝ່ ເພື່ອບໍ່ໃຫ້ລາຄາຂາຍຍ່ອຍສູງເກີນໄປ ເຊີ່ງຈະສົ່ງຜົນກະທົບຕໍ່ພື້ນຖານເສດຖະກິດ ກໍຄືກະທົບຕໍ່ພໍ່ແມ່ປະຊາຊົນ ໂດຍສະເພາະໄລຍະນີ້ ແມ່ນເປັນລະດູການປູກຝັງ ຈຶ່ງເຮັດໃຫ້ລາຄາຂາຍຍ່ອຍທີ່ຈັດຕັ້ງປະບັດຄັ້ງວັນທີ 8 ມິຖຸນາ 2022 ນີ້ ປັບລົງຄື: ລາຄານໍ້າມັນແອັດຊັງພິເສດ ປັບລົງ 150 ກີບຕໍ່ລິດ ຫຼື 0,54 % (ຈາກ 28.070 ກີບຕໍ່ລິດ ປັບລົງເປັນ 27.920 ກີບຕໍ່ລິດ); ລາຄານໍ້າມັນແອັດຊັງທໍາມະດາ ປັບລົງ 2.060 ກີບຕໍ່ລິດ ຫຼື 9,41 % (ຈາກ 21.890 ກີບຕໍ່ລິດ ປັບລົງເປັນ 2.060 ກີບຕໍ່ລິດ) ແລະ ລາຄານໍ້າມັນກາຊວນ ປັບລົງ 920 ກີບຕໍ່ລິດ ຫຼື 4,52 % (ຈາກ 20.340 ກີບຕໍ່ລິດ ປັບລົງເປັນ 19.420 ກີບຕໍ່ລິດ).

ນັບຕັ້ງແຕ່ຕົ້ນເດືອນພຶດສະພາ 2022 ຮອດປະຈຸບັນ ລັດຖະບານໄດ້ຫຼຸດອາກອນຊົມໃຊ້ສະເພາະນໍ້າມັນອັດຊັງທໍາມະດາ ແລະ ນໍ້າມັນກາຊວນ ລົງທັງໝົດ 02 ຄັ້ງ ຄື: ຄັ້ງວັນທີ 10 ພຶດສະພາ 2022 ຫຼຸດອາກອນຊົມໃຊ້ນໍ້າມັນແອັດຊັງທໍາມະດາ ຈາກ 31% ມາເປັນ 16%, ຫຼຸດອາກອນຊົມໃຊ້ນໍ້າມັນກາຊວນ ຈາກ 21% ມາເປັນ 11% ແລະ ຄັ້ງວັນທີ 08 ມິຖຸນາ 2022 ນີ້ ໄດ້ຫຼຸດອາກອນຊົມໃຊ້ນໍ້າມັນແອັດຊັງທໍາມະດາ ຈາກ 16% ມາເປັນ 5%, ຫຼຸດອາກອນຊົມໃຊ້ນໍ້າມັນກາຊວນ ຈາກ 11% ມາເປັນ 0% ທັງນີ້ກໍເພື່ອບໍ່ໃຫ້ລາຄາຂາຍຍ່ອຍນໍ້າມັນເຊື້ອໄຟ ພາຍໃນປະເທດ ສູງເກີນໄປ.

ຕໍ່ສະພາບດັ່ງກ່າວ, ຈຶ່ງຮຽກຮ້ອງມາຍັງທະຫານ, ຕໍາຫຼວດ, ພະນັກງານ ແລະ ພໍ່ແມ່ປະຊາຊົນບັນດາເຜົ່າ ຈົ່ງມີສະຕິ, ປະຢັດມັດທະຍັດໃຊ້ຈ່າຍໃນສິ່ງທີ່ຈໍາເປັນ ໂດຍສະເພາະ ແມ່ນການຊົມໃຊ້ຍານພາຫະນະ ຫຼື ຫັນໄປໃຊ້ຍານພາຫະນະທາງເລືອກ; ໃນຂະນະດຽວກັນ ກໍຮຽກຮ້ອງມາຍັງບັນດາຜູ້ປະກອບການທຸລະກິດຕ່າງໆ ຈົ່ງຢ່າໄດ້ສວຍ ໂອກາດຂຶ້ນລາຄາສິນຄ້າຕາມລໍາພັງໃຈ ແລະ ກັກຕຸນສິນຄ້າ ກໍຄືນໍ້າມັນເຊື້ອໄຟ ໃນໄລຍະລາຄານໍ້າມັນເຊື້ອໄຟເໜັງຕີງຂຶ້ນ, ຫາກພົບເຫັນການສວຍໂອກາດຂຶ້ນລາຄາສິນຄ້າ ແມ່ນຈະໄດ້ໃຊ້ມາດຕະການຕາມກົດໝາຍ ແລະ ລະບຽບການ. ຫາກພົບເຫັນ ການສວຍໂອກາດຂຶ້ນລາຄາສິນຄ້າ ທ່ານສາມາດ ໂທແຈ້ງສາຍດ່ວນ 1510.

ບົດຂ່າວ: ກົມການຄ້າພາຍໃນ

ທີ່ມາ ຫວຍPlazalaos98

Leave a Reply

%d bloggers like this: